Barta dirist’ dünyənen Q’ončuğoy şu baksuna q’amişakeq’an (Ǐvel mə̌ğ 33:1-12)

Ay düzgün bakalorox, Q’ončuğoy s’iya alabanan!
Ük’ təmizt’oğo Şot’o tərifləyinşbsune yarayinşbsa.
Tər farpi Şot’ay s’iya alabanan,
Vis’ simlə arfinaxun c’eğala səsen Şot’o tərifləyinşanan!
Şot’aynak’ me təzə mə̌ğə̌ mə̌ğpanan,
Mǔq səsurxo c’evksun,
Ef başarağa ak’est’un farpanan!
Axıri Q’ončux İzi tadi əyiti loxol çurk’alone,
Hər əşlə axıral śirik’ bex p’ap’esp’alone.
Düzgün bakalo, həmişə düz q’ərar c’evk’alone Şo,
Dirist’ dünyənə İz çuresunen buybalone.

Q’ončuğon İz sa əyiten göyurxone yaratmişi,
İz sa əmiren muč’uliğone t’ak’p’i Şot’in.
Şot’in dənizi xeyurxone girbi,
Aruma ambara bapi iz ç̌omo ğaç̌k’ala k’inək’
Bə̌ğə̌loy xeyurxone sagala bapi iz běšinə̌mə biq’i.
Barta dirist’ dünyənen Q’ončuğoy şu baksuna q’amişakeq’an,
Barta me dünyəne yəşəyinşalt’oğon Şot’ay kalaluği běš bulq’at’un k’os’p’i.
Şot’o görə ki, bito Şot’ay ǰomoxun c’eğala sa əyitene baki,
Bito Şot’ay sa əmirene bex p’ap’i.

Q’ončuğon q’erəz azuk’xoy ük’exun c’ovakalt’oğo içoğoy boşe efon,
Buxačuğo nu çalxalt’oğon bsun çureğalt’oğo puçane c’evk’on.
Q’ončuğon İz ük’e biq’est’iyorox isə həmişəluğe,
Şot’ay həzirbiyorox nəsiləxun nəsilə c’ovakiyal tene əfçibakon.

İz Buxačux Q’ončux bakala azuk’,
Q’ončuğon İçeynak’ c’ək’p’i azuk’ he bəxt’əvəre!
Ǐvel mə̌ğ 33:1-12