Ay Q’ončux, Vi q’ənədi oq’az zaynak’ ga be!

91-ci Ǐvel mə̌ğ

Ǐvel mə̌ğə̌ mə̌ğk’alo:
Ala Arśit’u içeynak’ umudi ga bit’in,
Bitova Başarbalt’ay xojina bakalt’in
Q’ončuğoy barada metəre nex:
«Şo bezi bač’ane, zaynak’ sa q’alane,
Şot’oz umudbaksa zu».
Buxačuğone va ǒxə̌lbali təlinəxun,
Elmux haq’ala azaraxun q’a bəloğoxun çark’est’on.
Şot’in va İz q’ənədxoy oq’a,
Vaynak’ q’ı̌ nu bakala galane ext’on.
Şot’ay vi bač’ane çurpsunen va q’orişebon,
Vaynak’ sa q’alxane bakon.
Nə üşenin hik’k’alaxun ten zap’eğon,
Nəəl ğene işiğen boseğala oxurxoxun.
Nə bayinq’luǧa tarak’ala azaraxun ten q’ı̌bon,
Nəəl işiğluğa haq’layinşala yaroğoxun.
Vi t’ǒğǒl sa hazar,
Vi yön tərəfəl vis’ hazar tan biti biyayin,
Va p’urumal zərəl tene laft’on.
Va isə saycə mot’oğo t’ǒǒxun běğsun,
Pist’oğon hetər içoğoy cazina zapsuna aksun mandale.

Düzgün yaq’en tağalo:
Ay Q’ončux, Vi q’ənədi oq’az zaynak’ ga be!

Ǐvel mə̌ğə̌ mə̌ğk’alo:
Ala Arśiyo vi bač’ane çurpsuna görə
Şər va ı̌ša tene biton,
Ə̌xile tarak’on bələ vaxun.
İz angelxone əmirbon Şot’in,
Şot’oğonal vi hər tağala yaq’a va q’orişt’unbon.
Kiyelt’un ext’on va şot’oğon,
Vi tura ǰěna lafst’a tet’un bark’on.
Şirə q’a dizik’ən ç̌axp’i c’ovakon hun,
Cəyil aslana q’a p’ə̌bulla dizik’ən vi turin oq’a laxon.

Buxačux:
Çark’est’oz kot’o Zu, şot’o görə ki, Za ük’ine çuresa,
Kot’o q’orişoz, şot’o görə ki, Za çalexsa.
İbakoz şot’o za k’alk’at’an,
İz t’ar ğine kiyexun biq’oz şot’ay,
Çark’est’i hörməti q’ončux booz!
Boxoy ömüren booz şot’o Zu,
Kamtezbal şot’oxun Zaxun eğala çark’esuna!