İsusi samci şagirdxo

Əyc’indəri İoan iz şagirdxoxun p’ǒğǒ iz t’ǒğǒl p’urum t’et’iya çurpeney. Şot’in içoğoy t’ǒğǒlxun c’ovakala İsusa ak’i pine: «Běğanan, Buxačuğoy Q’uzi mone!»

Me p’ə̌ şagirdal şot’ay əyitə ibaki İsusi bač’anexunt’un taśi. İsusen fırıpi İz bač’anexun eğalt’oğo ak’i şot’oğo pine: «Və̌x k’ə lazım?» Şot’oğon İsusa pit’un: «Ravvi, Hun mayan manst’a?» («Ravvi» «Məəlim» upsune.) İsusen şot’oğo pine: «Zaxun ekinan, ak’alnan». Şoroxal taśi İsusi maya manst’una at’unk’i, t’e ği vis’imci saadal śirik’əl e Şot’oxunt’un baki.

İoanaxun ibaki İsusi bač’anexun taśi p’ə̌ tanaxun soğo Simon P’yot’ri viçi Andreyey. Şot’in süft’ə taśi iz viçi Simona bə̌ğə̌bi şot’o pine: «Yan Xrist’osa bə̌ğə̌yanbi!» («Xrist’os» «lə̌ə̌meśi, yəni c’ək’eśi amdar» upsune.) Andreyen şot’o İsusi t’ǒğǒle taşeri. İsusen Simoni loxol běği pine: «Hun İoani ğar Simonnu, ama K’efa k’aleğalnu». (K’efa isə grek’i muzin P’yot’r, yəni ǰě upsune.)

Əyc’indəri İsus Galileyina taysune çureśi. Şot’in Filip’a bə̌ğə̌bi şot’o pine: «Bezi bač’anexun eki». Filip’al, Andrey q’a P’yot’r k’inək’ Bet’sayda şəhərexuney.

Filip’en Nat’anaila bə̌ğə̌bi şot’o pine: «Moiseyi k’anuna śameśi, xavareçalxonal pi Amdara bə̌ğə̌yanbi. Mo nazaret’lu İosifi ğar İsuse». Nat’anailen şot’o pine: «Nazaret’axun şaat’ sa şey c’eneğon ki?» Filip’en isə «eki, huncə ak’alnu» pine.

İsusen Nat’anaili İçuç eysuna ak’i şot’ay barada metəre pi: «Mo iz ük’e bic’luğ nu bakala əsil sa israillune». Nat’anailen «Hun za k’ən çalxsa?» pi Şot’oxun xavare haq’i. İsusen şot’o coğabe tadi: «Filip’en va k’alk’alt’uxun běš va incilnə xodin oq’a ak’ezuy». Nat’anailen Şot’o pine: «Ravvi, Buxačuğoy Ğar Hunnu, İsraili padçağ Hunnu!» İsusen pine: «Bezi va incilnə xodin oq’a azk’i upsuna görən Za vě baki? Hun kot’oxunal kala şeyurxo ak’alnu».
(İoanen śampi Mǔq Xavar 1:35-51)