27-ci Ǐvel mə̌ğ

Davidi Ǐvel mə̌ğ

1 Q’ončux bez işiğ, zaynak’ çark’esun eçalone,

Het’uxun q’ı̌boz zu?

Q’ončux bez yəşəyinşə q’orişalone,

Şuxun zap’eğoz zu?

2 Pis amdarxo bez loxol ěqeğat’an,

Bez düşmənxon za saki uksun çureğat’an

İçoğoy turin yaq’ tene biq’al,

Lamandi bitalt’un za nu çureğalorox.

3 Bez hərrəminə sa q’oşunenal biq’est’ayin,

Zu tez q’ı̌bon,

Zaxun davinal c’eğayin,

Bez ganuxun tez galk’on.

4 Tək sa şeyez çuresa Q’ončuğoxun,

Saycə mot’oz çuresa:

Bez yəşəyinşi axıral śirik’ Q’ončuğoy k’oya mandes bakaz.

Hər ği Şot’ay kalaluği q’a ı̌velluği k’ə baksuna ak’es,

Şot’ay məsk’ən saki gala hari Şot’o *bul k’os’p’i afırıpes bakaz.

5 Bezi t’ar ğine za İz t’ǒğǒl, İz bakala gala efane,

Za İz ı̌vel çadıren but’k’i

Şuk’k’ali kul nu p’ap’ala gala zaynak’ ga bane.

6 Zuval t’e vədə bezi hərrəminə biq’est’i düşmənxo turin oq’a laxi ç̌axç̌uxezk’on,

Q’ončuğoy çadıri běš bezi mǔqexun q’urbanxoz šamk’on,

Şot’ay s’iya alabala mə̌ğur mə̌ğpi əçizk’on zu.

7 Ay Q’ončux, Vaz k’ale, za ibaka,

Vi ük’ bok’ospsuni k’ə baksuna ak’est’i za coğab tada.

8 Vi «Za qə̌věkinan» əyit bez ǔmǔğone!

Mone, Va qə̌vězsa, ay Q’ončux,

9 Zaxun ç̌o ma tarada,

Me *k’ule loxol əcuğon biq’i Vaxun ma ə̌xilba,

Ay za kul boxodi Buxačux!

Vi kula zaxun ma zapa,

Ay bezi Çark’est’al bakala Buxačux!

10 Lap bezi bava-nananal za bosayin,

Q’ončuğon za tene boson.

11 Ay Q’ončux, za Vi yaq’en taysuna zomba,

Düşmənxoy niyətə içoğoy boş efa, za düz yaq’en taşa.

12 Ma barta bez pisə çureğalt’oğoy kiyel baft’az,

Ma barta c’eri əfçidən bez ç̌oyel çurk’alt’oğoy turin oq’a ç̌axç̌uxeśi tağaz.

13 Ama Q’ončuğon me dünyəne zaxun İz şaat’luğa kamtenebon, mot’o avazu!

14 Q’ončuğo bač’an tarada!

Ost’aar çurpa, ük’lü baka!

Vi umudi ganu Q’ončuğost’a ak’a!

(Ǐvel mə̌ğ 27)